اوپن یونیورسٹی: لائبریریوں میں مصنوعی ذہانت کا کردار پرقومی کنونشن کا انعقاد
”لائبریریوں میں اے آئی کے مؤثر استعمال کے لیے مضبوط نگرانی کا نظام ناگزیر: ماہرین کا متفقہ مؤقف
اسلام آباد 19اپریل( )علامہ اقبال اوپن یونیورسٹی میں ”لائبریریوں میں مصنوعی ذہانت (AI) کا کردار” کے موضوع پر 6ویں قومی کنونشن کا انعقاد کیا گیاجس میں لائبریری سائنس، انفارمیشن ٹیکنالوجی اور تعلیم وتحقیق سے وابستہ ماہرین نے شرکت کی۔ اس علمی تقریب کے مہمانِ خصوصی وائس چانسلر ایمرسن یونیورسٹی ملتان، پروفیسر ڈاکٹر محمد رمضان تھے۔کنونشن کا مقصد جدید ٹیکنالوجی، بالخصوص مصنوعی ذہانت کے لائبریریوں میں مؤثر انضمام، تحقیق و تعلیم میں اس کے کردار اور اس حوالے سے مستقبل کی حکمتِ عملی پر تبادلہ خیال کرنا تھا۔مقررین نے اپنے خطابات میں اس بات پر زور دیا کہ اے آئی نہ صرف تعلیمی اور تحقیقی سرگرمیوں میں انقلاب برپا کر رہی ہے بلکہ یہ لائبریریوں کو بھی زیادہ فعال، صارف دوست اور مؤثر بنا رہی ہے۔ انہوں نے کہا کہ لائبریری سائنس کے شعبے کو جدید خطوط پر استوار کرنے کے لیے ضروری ہے کہ مصنوعی ذہانت کے استعمال کو بتدریج اپنایا جائے۔ماہرین نے واضح کیا کہ اے آئی کے مؤثر استعمال کے لیے لائبریری اسٹاف کی پیشہ ورانہ تربیت، وسائل کا دانشمندانہ استعمال اور نگرانی کے جامع نظام کو یقینی بنانا ہوگا۔کنونشن سے خطاب کرنے والوں میں لندن ساؤتھ بینک یونیورسٹی (برطانیہ) کے عدنان عادل، چارلس سٹورٹ یونیورسٹی (آسٹریلیا) کے ڈاکٹر عاصم قیوم اور علامہ اقبال اوپن یونیورسٹی کے شعبہ لائبریری سائنس کے چیئرمین پروفیسر ڈاکٹر پرویز احمد شامل تھے۔ مقررین نے اپنے تحقیقی تجربات اور بین الاقوامی رجحانات پر مبنی نتائج بھی شرکاء کے ساتھ شیئر کیے۔اس بین الاقوامی کنونشن کا انعقاد علامہ اقبال اوپن یونیورسٹی کے شعبہ لائبریری اینڈ انفارمیشن سائنسز اور ڈائریکٹوریٹ آف اسٹوڈنٹ ایڈوائزری اینڈ کونسلنگ سروسز نے پاکستان لائبریری کلب(اسلام آباد چیپٹر)کے تعاون سے کیا تھا۔کنونشن میں ملک بھر سے انفارمیشن پروفیشنلز، لائبریری سائنس فیکلٹی، آئی ٹی ماہرین، طلبہ، محققین اور شعبے سے وابستہ افراد کی بھرپور شرکت نے اس تقریب کو ایک کامیاب علمی سنگِ میل بنا دیا۔پروگرام کے دوران ”لائبریریوں میں اے آئی: تحقیق اور علم تک رسائی کے مستقبل کی تشکیل” کے عنوان سے ایک خصوصی پینل ڈسکشن بھی منعقد ہوئی، جس میں شعبے کے ماہرین نے اپنے خیالات کا اظہار کیا۔آخر میں مقررین نے کنونشن کے شاندار انعقاد پر وائس چانسلر علامہ اقبال اوپن یونیورسٹی، پروفیسر ڈاکٹر ناصر محمود اور انتظامی ٹیم کا خصوصی شکریہ ادا کیا۔
(ڈائریکٹوریٹ آف پبلک ریلیشنز)